Hazırda Azərbaycan Respublikası Mərkəzi Bankının nəzarəti altında aşağıdakı layihələr məhdud sayda istifadəçi ilə sınaqdan keçirilir.
“Azərbaycan Beynəlxalq Bankı” ASC
İslam bankçılığı çərçivəsində Murabaha məhsulu
Sınaq müddəti: 01.04.2026 - 01.04.2027
“Azərbaycan Beynəlxalq Bankı” ASC tərəfindən təqdim edilən İslam bankçılıq layihəsi rezident hüquqi şəxslərin və fərdi sahibkarların daşınmaz və rəsmi reyestrdə qeydiyyata alınan daşınar əmlaklarının İslam bankçılığı prinsiplərinə uyğun maliyyələşdirilməsini nəzərdə tutur. Əmlak bank tərəfindən alınaraq əvvəlcədən razılaşdırılmış qiymətlə istifadəçiyə satılır, ödənişlər isə razılaşdırılmış qrafik əsasında həyata keçirilir. Sınaq müddətində məhsul yalnız bank filialları vasitəsilə təqdim olunur və müqavilə şərtləri Mərkəzi Bank ilə razılaşdırılır.
http://abb-bank.az/
info@abb-bank.az
+994 12 493 00 91
“Rabitəbank” ASC
İslam bankçılığı çərçivəsində Mudaraba və Murabaha məhsulu
Sınaq müddəti: 02.02.2026 - 02.02.2027
“Rabitəbank” ASC tərəfindən təqdim edilən layihə İslam bankçılığı prinsiplərinə uyğun olaraq hüquqi və fiziki şəxslərdən vəsaitlərin "Mudaraba" əsasında cəlb edilməsini və həmin vəsaitlərin sahibkarlıq subyektlərinin əsas vəsaitlərinin və dövriyyə mallarının "Murabaha" mexanizmi ilə maliyyələşdirilməsini nəzərdə tutur. Sərmayəçilərin vəsaitləri maksimum 12 ay müddətinə idarə edilir, gəlir və ya zərər faktiki nəticələrə əsasən bölüşdürülür. Layihə çərçivəsində şəffaflıq, rüblük hesabatlılıq və müstəqil audit tələbləri tətbiq olunur.
“BİTAZN” MMC
Kriptovalyuta birjası
Sınaq müddəti: 16.02.2026 - 16.08.2026
“BİTAZN” MMC tərəfindən təqdim edilən kriptovalyuta birjası layihəsi virtual aktivlərin milli valyuta və digər virtual aktivlərlə mübadiləsi, köçürülməsi və saxlanılması üzrə maliyyə xidmətlərinin məhdud sayda istifadəçi qrupu üçün göstərilməsini nəzərdə tutur. Birjada yalnız beynəlxalq tənzimlənən platformalarda listinqdə olan virtual aktivlər üzrə əməliyyatlara icazə verilir. Virtual aktivlərin platformadan kənara köçürülməsi qadağandır və saxlanma beynəlxalq təhlükəsizlik standartlarına uyğun həllər vasitəsilə təmin olunur. İstifadəçilər real vaxt rejimində qiymətləri izləyə və müxtəlif ticarət alətlərindən istifadə edə bilərlər.
“Pasha Pay” MMC
Kripto birja cüzdanına köçürmələr
Sınaq müddəti: 15.11.2024 - 08.02.2026
“PashaPay” MMC tərəfindən təqdim edilmiş bu layihədə “m10” tətbiqinin “Binance” kriptovalyuta platforması ilə inteqrasiyası nəzərdə tutulur. Bu innovativ məhsul istifadəçilərə kriptovalyuta əməliyyatlarını təhlükəsiz və şəffaf şəkildə icra etmək üçün “Binance” platformasında müştərinin manat cüzdanına mədaxil edilməsini asanlıqla həyata keçirmək imkanı yaradır.
“Unicapital İnvestisiya Şirkəti” ASC
Kriptobroker
Sınaq müddəti: 09.12.2024 - 08.02.2026
“Unicapital İnvestisiya şirkəti”nin təqdim etdiyi “Kriptobroker platforması” virtual aktivlərin asan və təhlükəsiz şəkildə alışı, satışı və saxlanılması ilə bağlı məhdud sayda istifadəçi qrupu üçün maliyyə xidmətini təklif edən sınaq layihəsidir. Platforma, həmçinin, istifadəçilərə virtual aktivlərin qiymətlərini izləmə imkanı verir və yalnız lisenziyalaşdırılmış, tənzimlənən xidmət təminatçıları ilə əməkdaşlıq edir.
